Boysun — ochiq osmon ostidagi mo‘jizaviy makon. Bu yerni ona tabiat ham bor go‘zalliklari, ajib yaratiqlari bilan siylaganki, tomoshadan, ona tabiat qo‘ynidan bahra olasan kishi. Toza va salqin havo, purviqor tog‘lar qo‘ynida sayr qilishning gashti o‘zgacha.
Boysun ta’rifini eshitgan borki, uni ko‘rishga oshiqadi. Shuning uchun ham tumanda turizm sohasi rivoj topgan. Albatta, tog‘-u toshlarni bosib, cho‘qqiga chiqishni sevuvchilar uchun o‘zgacha sarguzashtlarni taqdim etishi bilan maroqli. Ayniqsa, davlatimiz rahbarining Surxondaryoda turizmni rivojlantirish borasida yaratib bergan imkoniyatlari natijasida vohaga 2022-yil yakuniga ko‘ra 1,1 mln nafar turistlar tashrif buyurdi va bu ko‘rsatkich 5 yil avvalgi 85 ming sayyoh tashrifidan 13 martaga ortdi.
Viloyatda mavjud turizm potensialidan samarali foydalanish, yangi turistik yo‘nalishlarni tashkil etish bo‘yicha esa hali-hamon amaliy harakatlar davom etayotir. Tumandagi Zovboshi hududida tog‘ dor yo‘li loyihasiga start berilgani e’tiborga molik voqea deyish mumkin.
“Termiz-Boysun qurilish” MCHJ tomonidan amalga oshirilayotgan mazkur loyiha doirasida nafaqat tog‘ dor yo‘li, balki dam olish maskani ham quriladi.
S.Davlatova