To‘y-hasham, tug‘ilgan kun va bazmlarda qandolat mahsulotlariga ehtiyoj sezamiz va buyurtma berishga shoshamiz. Shunday paytlarda tanish-bilishlar orqali tavsiya etilgan joyga murojaat qila qolamiz. Sababi sinalgan mahsulotga nima yetsin. Angorlik Mahbuba Davlatova ham qo‘li shirin, pazanda ayollardan. Opani tanigan-bilganlar yoki bir bora shirinliklaridan buyurtma qilib, mazasini tatib ko‘rganlar faqat va faqat shu qandolatchi ayolga buyurtma qiladigan bo‘ladi.
Tadbirkor ayol qandolat mahsulotlari ishlab chiqarish faoliyatini dastlab 3 nafar xotin-qiz bilan boshlagan edi. Mijozlar sonining ortib, talabgorlar ko‘payavergach, tadbirkor faoliyatini kengaytirdi. 17 nafar pazanda xotin-qiz bilan ishlay boshladi. Hozirda esa ishchi-xodimlarning soni 20 nafarni tashkil etadi.
Qandolat sexiga tashrif buyursangiz, jarayonga mahliyo bo‘lib, o‘zingiz ham qanday qilib yordamga o‘tib ketganingizni bilmay qolasiz. Qandolatchi opalarning qo‘li-qo‘liga tegmay, pishir-kuydir bilan band bo‘ladi. Ular ishlaridan zavq olib uringanlari uchun ham pishiriqlar-u somcha-chuchvaralarining mazasi og‘izda qolsa kerak.
Ha aytgancha, korxonada 25 xil turdagi qandolat mahsulotlari tayyorlanadi.
Sohibjamol
