O‘zbek futbolchilari ko‘plab hajviy dasturlarning, ko‘ngilochar shoularning asosiy mavzusiga aylanib, tomoshabinda kulgu qo‘zg‘aydi. To‘g‘ri-da, o‘zining darvozasiga gol urish, necha yillar davomida butun bir davlatdan yalt etgan jamoaning shakllanmayotgani, buning ortidagi mish-mishlar haqiqatan ham kulgu bo‘ladigan, achchiq kinoyaga sabab mavzudir.
Ammo, ishonchimiz komilki, xalqimiz orasida Ronaldo-yu Messidan qolishmay to‘p suradigan futbolchilar ko‘plab topiladi. Ularni topish, izlash va imkon bermoq lozim xolos. Termiz davlat universitetining sport faoliyati va boshqaruvi fakulteti talabalari OTMlar o‘rtasida o‘tkazilgan “Universiada-2022” sport musobaqalarining futbol boʻyicha final bosqichida munosib ishtirok etdi. Kuchli jamoalar orasidan faxrli 3-o‘rinni egallashdi. To‘g‘ri, muhimi ishtirok. Bu ishtirok, bu imkon sabab, ushbu jamoa orasidan milliy terma jamoaning kelajagi uchun to‘p suradigan mahoratli futbolchilar saralanib olinsa, ajab emas.
Surxondaryoga qaytgan futbol jamoasi munosib kutib olindi va erishgan yutuqlari e’tirof etildi. chempionlikni qo‘lga kiritgan talabalarga diplom hamda esdalik sovg‘alari topshirildi.
H.Baxtiyorova
