Xivada bo‘lganmisiz? Bordi-yu bormagan bo‘lsangiz, vaqt topib, Xiva ko‘chalarini kezishni, sayr-u sayohat qilishni tavsiya qilgan bo‘lardik. Ochiq osmon ostidagi ushbu mo‘jaz va qadimiy shahar sizni o‘ziga maftun etishi shubhasiz. Xiva sizni o‘tmish bilan yuzlashtiradi. Xuddi vaqt mashinasida bir necha asr oldingi davrga tushib qolgandek his etasiz o‘zingizni. Bor salobati, go‘zalligi va tarixiy qiymatini saqlab qolgan shaharda ana shunday hislar chulg‘ab oladi sizni. Hayratingiz va havasingizni yashira olmaysiz.
Termiz davlat universiteti rahbariyati va kasaba uyushmasi tashabbusi bilan oliygohda mehnat faoliyatini olib borayotgan bir guruh xodimlar Xorazm diyorining turistik obyektlarida 2 kunlik safari chog‘ida ana shunday tuyg‘ularni, taassurotlarni o‘z boshlaridan o‘tkazdilar.
Sayohat davomida qadim Xiva shahrining Ichan qa’la yodgorlik majmuidagi me’moriy yodgorliklar, muzeylar va Kaltaminor kabi inshootlarini shunchaki tomosha qilish bilan kifoyalanishmadi, ushbu yodgorlik va muzeylar haqida qimmatli ma’lumotlarga ega bo‘lishdi, manzilgohlar bilan bog‘liq qiziqarli va tarixiy voqea va rivoyatlarni tinglashdi.
Sohibjamol
