Fan-texnika rivoj topgan asrda yashayapmiz. Robotlar, qandaydir uskunalar yasash bugun yosh bolaning-da qo‘lidan keladigan mashg‘ulotga aylangan. Ularning funksiyalari, qanday vazifalarni bajara olishiga qarab turlayverasiz. Viloyatimizdagi “Barkamol avlod” bolalar maktablarida esa o‘g‘il-qizlar bo‘sh vaqtlarini mazmunli o‘tkazib kelishayotir. Zamonaviy axborot kommunikatsiya texnologiyalariga bo‘lgan ko‘nikmalarini shakllantirib, mikrobloklar, robotlar yasashyapti.
Viloyat “Barkamol avlod” bolalar maktabida esa “Besh tashabbus axborot texnologiyalari” shiori ostida “Robotlar jangi” hududiy musobaqasi o‘tkazildi.
Musobaqa qizg‘in kechdi. Tomoshabinlar texnikalarning jangini tomosha qilib, zavq-shavqqa to‘ldilar. His-hayajonga to‘la hayqiriqlar, qarsaklar musobaga o‘zgacha shukuh bahsh etdi. Boysun tumanining “Barkamol avlod” bolalar maktabining nomini munosib himoya qilgan Tohir Muhammadiyev yasagan robotga teng keladigani topilmadi va 1-o‘ringa loyiq topildi. Jarqo‘rg‘onliklar 2-, sho‘rchiliklar esa 3-o‘rinni band etishdi. Ularga tashkilotchilarning diplom hamda esdalik sovg‘alari topshirildi.
S.Murodova
