Muzeylar butun boshli tarixni o‘zida mujassam etib turuvchi betakror maskandir. Qadim tarixga ega vohamizda ikki muzey qad rostlab, muxlislarni o‘z bag‘rida saqlab kelayotgan ajib durdonayu noyob yodgorliklar, arxeologik topilmalari bilan maftun etib kelayotgani barchamizga ayon. Quvonarlisi, endilikda yana bir yangi muzey tashkil etilishi, viloyatimiz ko‘rkiga ko‘rk qo‘shib, sayyohlarni jalb etishda o‘ziga xos maskan bo‘lishi kutilmoqda.
Yunon-Baqtriya tarixi muzeyini tashkil etish borasida allaqachon qizg‘in ishlar boshlab yuborilgani fikrimizga dalil.
Viloyat Turizm va madaniy meros boshqarmasi, Boysun tumani hokimligi va tuman kadastr boʻlimlari xodimlaridan iborat ishchi guruh Yunon-Baqtriya tarixi muzeyini tashkil etish boʻyicha dastlabki ishlarni boshlashdi.
Dastlab muzey uchun ajratilgan joylarning koordinatlari aniqlanib, hudud xaritasiga kiritildi. 21×14 metr maydonda muzey loyihasini tuzish boʻyicha kelishib olindi.
Shu bilan birga, Madaniy meros agentligi tomonidan yodgorlikning muhofaza hududini belgilash, obyektni pasportlashtirish, restavratsiya va konservatsiya qilish boʻyicha ham loyihalar tayyorlanmoqda.
A.Safarova
