Sifat tekshiruvlaridan o‘tmagan va qo‘lbola tarzda tayyorlangan mahsulot uni tayyorlaganning cho‘ntagini qappaytirishi aniq. Ammo, turgan gapki, iste’molchi sog‘ligi uchun xatarli. Afsuski, har doim ham mahsulot yorlig‘iga e’tibor qaratavermasligimiz yomon.
Bosh prokuratura huzuridagi Departament, DXX va IIBning Sherobod tumani bo‘limlari olib borgan tekshiruvlar natijasida alkogol mahsulotlarini qo‘lbola usulda tayyorlab sotayotgan yashirin sex faoliyatiga nuqta qo‘yildi.
Fuqarolar N.R. va S.YU.ning xonadonlarida qo‘lbola usulda tayyorlangan 675 dona “Denov” nomli alkogol mahsulotlari, rangli printerda chop etilgan 466 dona qalbaki aktsiz markalar hamda boshqa moddiy ashyolar ashyoviy dalil sifatida olingan. Holat yuzasidan jinoyat ishi qo‘zg‘atilib, tergov harakatlari olib borilmoqda.
S.Murodova