Hunar ayol kishining ko‘rki. Mehnati bilan yuzi issiq aslida. Sharq ayollari borki, doimo yaratuvchanlikka intiladi. Mehnat bilan o‘ziga zeb beradi. Setora Berdiyeva ham bolaligidan tikish-bichishga qiziqqani, u-bu kiyim-kechaklarni o‘zi ham tikib ketavergani uchunmi, tikuvchilikni tezda o‘rganib oldi. Mahalla-ko‘yda buyurtma berganning kiyim-kechagini tikib yursa bo‘lardi. Ammo, u ko‘plar bilan yelkama-yelka ishlab, tajribasini oshirishni istadi.
Bugun uning quvonchi cheksiz. U Sho‘rchi tumanida o‘z faoliyatini boshlagan “Maftuna Sho‘rchi dizayn” korxonasida ish boshlab, kiyim-kechaklar, choychab-u yostiqlar tikib, tuman ahlining ehtiyojini qondirishga harakat qilyapti. Bilganlarini o‘rgatib, bilmaganlarini yoshi katta chevar opalaridan o‘rganyapti.
“Maftuna Sho‘rchi dizayn” mas’uliyati cheklangan jamiyatining loyiha qiymati 417 ming dollarni tashkil etadi. Quvvati 350 o‘rinli bo‘lgan korxonada ayni paytda 131 nafar qo‘li gul tikuvchi ish faoliyatini boshlagan.
H.Baxtiyorova
