Ba’zan barcha shart-sharoitlarimiz muhayyo bo‘lishiga qaramay sabab topib, noliymiz. Imkoniyatlardan unumli foydalanishni bilmaymiz. Bu bilan ko‘p narsalarni boy berayotganimizni tushunganimizda esa kech bo‘lishi mumkin…
Dilafro‘z Toshtemirova nochorgina oilada yashaydi. Imkonsizlikdan o‘ziga imkon qidirishga urindi. Nochorlikdan chiqish yo‘li bilim ekaniga ishondi. Shuning uchun o‘qidi, izlandi. Bo‘sh vaqtidan unumli foydalandi. Izlanishlar samarasi o‘laroq oliygoh talabasi bo‘ldi. Bu Dilafro‘zni quvontirdi. Ammo, shartnoma asosida o‘qishga kirgani biroz xafa qilgani bor gap. Onasini qiyin ahvolga solib qo‘yishni istamaydi-da.
Tavakkal qilib o‘qiy boshladi. “Talabaga madad” loyihasi haqida eshitib qolib, hujjatlarini topshirdi. Hayriyatki, yoshlarni qo‘llab-quvvatlovchi mana shunday loyihalar bor ekan, Dilafro‘zning 30 foiz shartnoma puli to‘lab beriladigan bo‘ldi.
— “Talabaga madad” haqiqatan ham men va oilam uchun katta madad bo‘ldi, — deydi Dilafro‘z. — Shartnoma pulini qanday to‘layman deb o‘ylovda edim. Endi bor e’tiborimni o‘qishga qaratib, sevimli mashg‘ulotlarim bilan bandman.
Hilol
