O‘zbekistonda homiladorlik va tug‘ish bo‘yicha nafaqani tayinlash hamda to‘lashning yangi tartibi yuzasidan rasmiy tushuntirish berildi. Unga ko‘ra, nafaqa miqdori ayolning sug‘urta stajiga qarab hisoblanadi va bunda belgilangan koeffitsiyentlar qo‘llaniladi.
Xususan, sug‘urta staji 10 oydan 24 oygacha bo‘lgan ayollarga o‘rtacha ish haqining 75 foizi, 25 oydan 60 oygacha bo‘lganda 85 foizi, 61 oy va undan ortiq bo‘lganda esa 100 foizi miqdorida nafaqa to‘lanadi.
Mas’ul idoralar mazkur tartib Mehnat kodeksi talablariga zid emasligini qayd etib, nafaqa miqdorining eng kam darajasi o‘rtacha ish haqining kamida 75 foizi etib belgilanganini ta’kidladilar. Ushbu yangilik homilador ayollarning ijtimoiy himoyasini yanada kuchaytirishga qaratilgan.
