Insofsiz ijrochilar reyestri shakllantiriladi

«Insofsiz ijrochilarning yagona reyestrini shakllantirish tartibi to‘g‘risida»gi nizom Adliya vazirligida davlat ro‘yxatidan o‘tkazildi (ro‘yxat raqami 3599, 17.01.2025-y.). Nizom Insofsiz ijrochilarning yagona reyestrini shakllantirish va yuritish tartibini belgilaydi.
Reyestr vakolatli organ (Iqtisodiyot va moliya vazirligi) tomonidan shakllantiriladigan ro‘yxatdan iborat bo‘lib, unga xarid qilish tartib-taomillari yakunlari bo‘yicha belgilangan shartlar asosida davlat buyurtmachisi bilan shartnoma tuzishni va davlat xaridlarini amalga oshirishni rad etgan yoki boshqacha usulda bo‘yin tovlagan xarid qilish tartib-taomillari g‘oliblari to‘g‘risidagi, majburiyatlarni bajarmaganlikda yoxud tegishli tarzda bajarmaganlikda belgilangan tartibda aybdor deb topilgan ijrochilar haqidagi hamda davlat xaridlari jarayonida yolg‘on yoki soxta hujjatlarni taqdim etgan, ayni bitta lotda ishtirok etgan affillangan shaxslar yoki manfaatlar to‘qnashuvi to‘g‘risidagi ma’lumotlar kiritiladi.
Insofsiz ijrochi Reyestrga kiritilganidan boshlab, 2 yil muddat o‘tgandan so‘ng avtomatik tarzda Reyestrdan chiqariladi. Insofsiz ijrochi sudning tegishli qaroriga ko‘ra Reyestrdan chiqarilishi mumkin.