Muzrabot tumanining Afg‘oniston va Turkmaniston bilan chegaradosh Chegarachi mahallasida 21-sonli davlat maktabgacha ta’lim tashkiloti foydalanishga topshirildi. 4 milliard 800 million so‘m mablag‘ evaziga barpo etilgan mazkur bog‘cha 120 nafar bolani qamrab olish imkoniyatiga ega.
Ochilish marosimida tuman hokimi Abdulla Mamatqulov, mahalla nuroniylari, faollar va mas’ul tashkilotlar vakillari ishtirok etdi. Tadbirda yangi bog‘chada bolalarning ta’lim-tarbiyasi uchun yaratilgan sharoitlar bilan tanishildi. Ayniqsa, tumanning eng chekka hududlaridan birida zamonaviy maktabgacha ta’lim maskanining ish boshlashi mahalla aholisi uchun muhim voqea bo‘ldi. Yangi tashkilot bolalarning maktabgacha ta’lim bilan qamrovini kengaytirish va ularning har tomonlama rivojlanishiga xizmat qiladi.
Ta’kidlash joiz, joriy yilda Muzrabot tumanida foydalanishga topshirilgan maktabgacha ta’lim tashkilotlari soni 10 taga yetdi. Chegarachi mahallasidagi 21-sonli bog‘cha ushbu ro‘yxatdagi o‘ninchi tashkilot bo‘ldi.
Bu kabi loyihalar ta’lim infratuzilmasini rivojlantirish, hatto eng chekka hududlarda ham bolalar uchun munosib sharoit yaratish borasidagi ishlarning amaliy ifodasidir.
