O‘zbekiston Fanlar akademiyasi O‘simlik moddalari kimyosi instituti olimlari tomonidan tutqanoq xurujlarini kamaytirishga yordam beruvchi yangi kimyoviy modda — epitriyazolin o‘rganildi.
Tadqiqotchilar 30 ga yaqin yangi kimyoviy moddani tahlil qilib, ular orasidan epitriyazolinni istiqbolli modda sifatida tanlagan. Uning olinishi usuli ishlab chiqilib, tarkibi va xususiyatlari o‘rganildi.
Tajribalar davomida epitriyazolinning tutqanoq xurujlarini kamaytirishga ta’sir qilishi aniqlangan. Tadqiqot natijalariga ko‘ra, modda karbamazepin va Konvuleksga nisbatan 1,5–2 barobar kam zaharli bo‘lib, xavfsizlik chegarasi ham yuqoriroq ekani qayd etilgan.
Mutaxassislar epitriyazolinni ishlab chiqarish texnologiyasini ishlab chiqib, uning dastlabki namunalarini ham tayyorlagan.
