Qiziriq tumanida atrof-muhit musaffoligini ta’minlash va chiqindilarni samarali boshqarishga xizmat qiladigan yangi korxona faoliyatini boshladi. Viloyat hokimi U. Qosimovning tumanga tashrifi davomida “Qiziriq Invest” MChJga qarashli chiqindilarni qabul qilish, saralash va qayta ishlash korxonasi faoliyati bilan yaqindan tanishildi.
Korxonada chiqindilarni zamonaviy usullarda qabul qilish, turlarga ajratish va qayta ishlash yo‘lga qo‘yilgan. Bu orqali hududlarda sanitariya holatini yaxshilash, atrof-muhitni asrash hamda chiqindilarni samarali boshqarishga qaratilgan ishlarni yanada kuchaytirish ko‘zda tutilgan. Tashrif davomida korxonaning ish jarayonlari, mavjud imkoniyatlari va kelgusidagi rejalari ko‘zdan kechirildi. Uning ishlab chiqarish quvvatidan samarali foydalanish, yangi ish o‘rinlarini yaratish va ekologik barqarorlikni ta’minlash bo‘yicha mas’ullarga tegishli vazifalar belgilab berildi.
Yangi korxonaning ishga tushirilishi chiqindilarni shunchaki yig‘ish emas, balki ularni saralash va qayta ishlash orqali ulardan samarali foydalanish, hududlar tozaligini ta’minlash hamda ekologik madaniyatni yuksaltirish yo‘lidagi muhim qadam bo‘ldi.
