Mehr-oqibat va insonparvarlik jamiyatimizning eng ezgu qadriyatlaridan biridir. Ayniqsa, e’tibor va g‘amxo‘rlikka muhtoj insonlarni qo‘llab-quvvatlash, ularning qobiliyatini yuzaga chiqarish va jamiyatdagi faolligini rag‘batlantirish muhim ahamiyat kasb etadi.
Qumqo‘rg‘on tumanida “Yaxshilik karvoni” loyihasi doirasida “Ma’rifat” targ‘ibotchilar jamiyati vakillari “G‘amxo‘rlik” markazi (Muruvvat uyi)ga tashrif buyurdi. Tashrif davomida markaz tarbiyalanuvchilari tomonidan tayyorlangan turli qo‘l mehnati mahsulotlari, hunarmandchilik buyumlari va ijodiy ishlanmalar ko‘zdan kechirildi.
Tarbiyalanuvchilarning mehnatsevarligi, iste’dodi va kasb-hunarga bo‘lgan qiziqishi yuqori baholanib, ular bilan samimiy muloqot o‘tkazildi. Suhbat davomida inson qalbiga mehr va e’tibor berish, ezgulik, mehr-oqibat hamda insonparvarlik g‘oyalarini keng targ‘ib etishning ahamiyati ta’kidlandi.
Bunday ezgu tashabbuslar tarbiyalanuvchilarni ruhlantirish, ularning iste’dodini qo‘llab-quvvatlash va jamiyatga daxldorlik tuyg‘usini mustahkamlashga xizmat qiladi.
