Yoshlarni sportga keng jalb etish, ularning jismoniy tayyorgarligi va irodasini mustahkamlashda “Besh tashabbus olimpiadasi” muhim o‘rin tutmoqda. Musobaqalar yoshlar o‘rtasida sog‘lom raqobatni kuchaytirib, iqtidorli sportchilarni kashf etishga xizmat qilmoqda.
Toshkent viloyatida “Besh tashabbus olimpiadasi” doirasida workout sport turi bo‘yicha Respublika bosqichi musobaqalari o‘tkazildi. Unda respublikamizning barcha hududlaridan tashrif buyurgan sportchilar kuch, chidamlilik, jismoniy tayyorgarlik va texnik mahorat borasida o‘zaro bellashdi.
Murosasiz bahslar yakunida Toshkent viloyati jamoasi birinchi, Xorazm viloyati ikkinchi, Surxondaryo viloyati jamoasi esa uchinchi o‘rinni egalladi.Musobaqa yakunida g‘olib va sovrindorlar diplom, medal hamda esdalik sovg‘alari bilan taqdirlandi.
