O‘zbekiston xalqlarining asriy do‘stligi, o‘zaro hurmat va bag‘rikengligi – mamlakatimiz tinchligi va taraqqiyotining mustahkam poydevoridir. Xalqlar do‘stligi kuni munosabati bilan respublika bo‘ylab o‘tkazilayotgan “Do‘stlik” festivali doirasida Termiz shahrida ham tantanali bayram tadbiri yuqori saviyada tashkil etildi.
Festivalning “Do‘stlik ohanglari” nomli gala-konsert dasturida turli millat va elat vakillari o‘zlarining milliy kuy-qo‘shiqlari, jo‘shqin raqslari va sahna ko‘rinishlari bilan chiqish qilib, Yangi O‘zbekistonda hukm surayotgan millatlararo totuvlik va ahillik muhitini yorqin namoyon etdilar.
Tadbir davomida do‘stlik, hamjihatlik va birdamlik g‘oyalari keng targ‘ib etilib, tinchlik va barqarorlikni asrash, turli millatlar o‘rtasidagi totuvlikni mustahkamlash har bir fuqaroning muqaddas burchi ekani alohida ta’kidlandi. Bu bayram xalqimizning birligini yanada mustahkamlovchi muhim voqea bo‘ldi.
