Yurtimiz sportchilari xalqaro maydonlarda erishayotgan yuksak natijalar O‘zbekistonda sportni rivojlantirish va yoshlarni sog‘lom turmush tarziga jalb etish borasidagi islohotlar samarasi ekanini yaqqol namoyon etmoqda. Sho‘rchi tumani vakilasi Sevinch Xurramovaning navbatdagi yutug‘i buning yana bir yorqin isbotidir.
Sho‘rchi tumanining “Zarbdor” mahallasida yashovchi iqtidorli bokschi Sevinch Xurramova Osiyo chempionatida yuqori mahorat ko‘rsatib, oltin medalni qo‘lga kiritdi va Osiyo chempioni degan sharafli unvonga sazovor bo‘ldi.
Chempionni tantanali kutib olish marosimida tuman hokimi Akbarali Ishmurzoyev sportchini samimiy tabriklab, uning g‘alabasi Sho‘rchi tumani va butun Surxondaryo sporti uchun ulkan faxr ekanini ta’kidladi.
Mazkur muvaffaqiyat nafaqat hudud sporti salohiyatini namoyon etadi, balki yoshlarni sport bilan muntazam shug‘ullanishga, yurtimiz sha’nini xalqaro musobaqalarda munosib himoya qilishga ruhlantiradigan yorqin namuna bo‘lib xizmat qiladi.
