Vazirlar Mahkamasining yangi qaroriga muvofiq, umumiy o‘rta ta’lim tashkilotlarida faoliyat yuritayotgan oliy malaka toifasiga ega o‘qituvchilar uchun pedagogika yo‘nalishida maqsadli magistratura tizimi joriy etiladi.
Yangi tartibga ko‘ra, pedagoglar ishdan ajralmagan holda masofaviy ta’lim shaklida tahsil oladi. Magistraturani tamomlagan o‘qituvchilar esa uch yil davomida umumiy o‘rta ta’lim muassasalarida mehnat faoliyatini davom ettirishi belgilandi.
2026–2027-o‘quv yilidan boshlab ushbu tizim Nizomiy nomidagi O‘zbekiston milliy pedagogika universitetida yo‘lga qo‘yiladi. Qaror tajribali pedagoglarning ilmiy salohiyatini oshirish, zamonaviy bilim va kompetensiyalarini mustahkamlash hamda ta’lim sifatini yuksaltirishga xizmat qiladigan muhim qadam sifatida baholanmoqda.
