Xavfsizlik kamarini taqishga tibbiy jihatdan qarshi ko‘rsatma mavjud bo‘lgan fuqarolar endilikda tegishli ma’lumotnomani my.gov.uz portali orqali onlayn tarzda olish imkoniga ega bo‘ldi. Yangi tartib ortiqcha byurokratik jarayonlarni qisqartirib, xizmatdan foydalanishni sezilarli darajada soddalashtiradi.
Buning uchun fuqaro avval tibbiyot muassasasida shifokor ko‘rigidan o‘tadi va tibbiy xulosa elektron bazaga kiritiladi. Shundan so‘ng ma’lumotnoma tizimda avtomatik shakllanib, foydalanuvchiga elektron ko‘rinishda taqdim etiladi.
Ta’kidlanishicha, xizmat bepul bo‘lib, qo‘shimcha hujjatlar talab etilmaydi.
Mazkur yangilik raqamli davlat xizmatlarini kengaytirish, fuqarolar uchun qulaylik yaratish hamda yo‘l harakati xavfsizligi qoidalarini inson salomatligi holatini hisobga olgan holda yanada moslashuvchan qilishga xizmat qiladi.
