Surxondaryo viloyati musiqali drama teatrida namoyish etilgan “Adolat fasli” tarixiy drama spektakli tomoshabinlarda katta taassurot qoldirdi. O‘zbekiston xalq shoiri Usmon Azim asari asosida sahnalashtirilgan ushbu asarda Sohibqiron Amir Temurning davlat boshqaruvi, adolat tamoyillari va yurt ravnaqi yo‘lidagi faoliyati badiiy talqin qilindi.
Rejissyor Farhod Boltayev tomonidan sahnalashtirilgan spektakl, rassom Xayrulla Chorshanbiyev yaratgan sahna yechimlari hamda aktyorlarning mahoratli ijrosi bilan tarixiy voqealarni bugungi kun bilan uyg‘unlashtira oldi. Asar tomoshabinlarni nafaqat Amir Temur davriga sayohat qildirdi, balki adolat, mas’uliyat va vatanparvarlik kabi umuminsoniy qadriyatlar haqida mushohada yuritishga undadi.
Namoyishda Surxondaryo viloyati hokimi Ulug‘bek Qosimov, nuroniylar, madaniyat va san’at vakillari hamda keng jamoatchilik ishtirok etdi.
Bugungi globallashuv davrida tarixiy xotirani asrash, buyuk ajdodlar merosini yoshlar ongiga singdirish muhim ahamiyat kasb etmoqda. Shu ma’noda “Adolat fasli” spektakli madaniy hayotdagi muhim voqea bo‘lib, milliy o‘zlikni anglash, tarixiy merosga hurmat va adolat g‘oyalarini targ‘ib etishga xizmat qildi.
