Korrupsiyaga qarshi kurashni kuchaytirishga qaratilgan yangi qonun Senat tomonidan ma’qullandi.
Endilikda pora olish, pora berish va poraxo‘rlikda vositachilik qilgan shaxslar jazoni muddatidan ilgari shartli ravishda o‘tashdan ozod etilmaydi. Shuningdek, korrupsiyaga oid jinoyatlar ro‘yxati aniq belgilanib, xizmat mavqeidan foydalanib sodir etilgan firibgarlik uchun jazo 10 yilgacha ozodlikdan mahrum qilish bilan kuchaytirilmoqda.
Bundan tashqari, xususiy sektordagi poraxo‘rlik hamda davlat xaridlari va budjet tizimidagi qonunbuzilishlar uchun javobgarlik yanada qat’iylashtiriladi.
Mazkur o‘zgarishlar korrupsiyaga nisbatan murosasiz munosabatni mustahkamlash, qonun ustuvorligini ta’minlash va jamiyatda adolat tamoyillarini qaror toptirishga xizmat qiladi.
