Prezidentning yangi farmoniga ko‘ra, qurilish sohasida davlat xizmatlari yanada soddalashtirilib, tadbirkorlarning vaqt va mablag‘ sarfi sezilarli darajada qisqartiriladi.
2026-yil 1-sentyabrdan arxitektura va shaharsozlik bo‘yicha bir nechta xizmatlar yagona tizimga birlashtiriladi. Muhandislik-kommunikatsiya tarmoqlariga ulanish esa “1 ta ariza – 1 to‘lov” tamoyili asosida amalga oshiriladi.
Shuningdek, binoning mustahkamligi va yong‘in xavfsizligiga ta’sir qilmaydigan ayrim loyiha o‘zgarishlarini qayta kelishish talabi bekor qilinadi. Davlat xizmatlari jarayonida aniqlangan kamchiliklarni bartaraf etish uchun qo‘shimcha 5 ish kuni beriladi.
Yangi tartiblar qurilish jarayonlarini tezlashtirish, ortiqcha byurokratik to‘siqlarni bartaraf etish hamda tadbirkorlar uchun qulay biznes muhitini yaratishga xizmat qiladi. 2026-yil 1-sentyabrdan esa yirik qurilish obyektlarida videokuzatuv kameralarini majburiy o‘rnatish amaliyoti joriy etiladi.
