Mintaqalararo iqtisodiy aloqalarni mustahkamlash va yangi bozorlarni rivojlantirish bugungi kunda dolzarb vazifalardan biri hisoblanadi. Ayniqsa, qo‘shni davlatlar bilan o‘zaro manfaatli hamkorlikni kengaytirish nafaqat savdo hajmini oshiradi, balki hududlar iqtisodiy taraqqiyotiga ham xizmat qiladi.
“Termiz xalqaro savdo markazi” erkin savdo zonasida Surxondaryo va Afg‘oniston tadbirkorlari ishtirokida biznes forum bo‘lib o‘tdi. Unda viloyat hokimi Ulug‘bek Qosimov Afg‘oniston Savdo va investitsiyalar palatasi vakillari bilan uchrashib, ikki tomonlama savdo-iqtisodiy aloqalarni kengaytirish masalalarini muhokama qildi. Ta’kidlanganidek, so‘nggi yillarda o‘zaro savdo hajmi keskin oshib, 2024 yilda 48 million dollardan 239 million dollarga yetgan.
Hududning qulay geografik joylashuvi, rivojlangan transport infratuzilmasi va erkin savdo zonasi imkoniyatlari hamkorlikni yanada rivojlantirishga xizmat qilmoqda. Forumda qurilish materiallari ishlab chiqarish, farmatsevtika, qishloq xo‘jaligi mahsulotlarini qayta ishlash, oziq-ovqat sanoati va logistika sohalarida qo‘shma loyihalarni amalga oshirish bo‘yicha qator takliflar ilgari surildi. Shuningdek, eksport-import yo‘nalishlarini diversifikatsiya qilish va qo‘shilgan qiymat zanjirini kengaytirish masalalariga alohida e’tibor qaratildi.
Mazkur forum ikki mamlakat tadbirkorlari o‘rtasida yangi kelishuvlarga erishish, istiqbolli loyihalarni yo‘lga qo‘yish hamda savdo hajmini yanada oshirish uchun muhim platforma bo‘lib xizmat qilmoqda. Bu esa kelgusida mustahkam iqtisodiy sheriklikni rivojlantirishga va mintaqaviy barqarorlikni ta’minlashga zamin yaratadi.
