Bugungi kunda mamlakatimizda yoshlarga qaratilayotgan e’tibor, ularning har tomonlama rivojlanishi uchun yaratilayotgan shart-sharoitlar davlat siyosatining ustuvor yo‘nalishlaridan biri hisoblanadi. Ayniqsa, yosh avlodni vatanparvarlik ruhida tarbiyalash, ularni kasb-hunarli, bilimli va mustaqil fikrlaydigan insonlar etib shakllantirish borasida amalga oshirilayotgan ishlar alohida ahamiyat kasb etmoqda. Bu borada Surxondaryo viloyati Favqulodda vaziyatlar boshqarmasi tomonidan ham tizimli va samarali ishlar yo‘lga qo‘yilgan.
Boshqarma tomonidan yoshlar bilan ishlash, ularni qo‘llab-quvvatlash, muammolarini o‘rganish hamda hayotda o‘z o‘rnini topishlariga ko‘maklashish maqsadida aniq reja asosida keng ko‘lamli tadbirlar tashkil etib kelinmoqda. Xususan, har hafta payshanba kuni “Yoshlar kuni” sifatida belgilangan bo‘lib, ushbu sana doirasida yoshlar bilan ochiq muloqotlar, uchrashuvlar va targ‘ibot tadbirlari muntazam o‘tkazilmoqda.
Ana shunday uchrashuvlarning navbatdagisi Jarqo‘rg‘on tumanida tashkil etildi. Unda boshqarma boshlig‘i o‘rinbosari, podpolkovnik T.To‘rayev tomonidan otaliqqa olingan yoshlar bilan samimiy suhbat o‘tkazildi. Mazkur uchrashuv yoshlarning muammolarini bevosita tinglash, ularning qiziqishlari va intilishlarini o‘rganish hamda amaliy yordam ko‘rsatishga qaratilgani bilan alohida ahamiyat kasb etdi.
Uchrashuv davomida yoshlar o‘zlarini qiynab kelayotgan turli masalalar — ish bilan ta’minlanish, kasb-hunar o‘rganish, ta’lim olish imkoniyatlari, bo‘sh vaqtni mazmunli tashkil etish kabi dolzarb mavzular yuzasidan fikr bildirdilar. Har bir murojaat e’tibor bilan tinglanib, ularni hal etish bo‘yicha mas’ul mutaxassislar tomonidan aniq tavsiyalar berildi. Ayrim muammolar joyida hal etilgan bo‘lsa, boshqalari nazoratga olinib, bosqichma-bosqich yechim topilishi belgilandi.
Shuningdek, uchrashuv jarayonida yoshlarni kasb-hunar egallashga undash, ularni zamonaviy bilim va ko‘nikmalar bilan qurollantirish, ayniqsa favqulodda vaziyatlar tizimiga qiziqish uyg‘otish masalalariga ham alohida e’tibor qaratildi. Yoshlar bilan olib borilgan suhbatlarda ularning hayotiy maqsadlari, kelajak rejalari haqida fikr almashilib, ularga to‘g‘ri yo‘l-yo‘riq ko‘rsatildi.
Yoshlar tarbiyasida vatanparvarlik ruhini shakllantirish muhim o‘rin tutadi. Shu bois uchrashuv davomida Vatanga sadoqat, xalq manfaatlariga xizmat qilish, tinchlik va osoyishtalikni asrab-avaylash kabi tushunchalar keng targ‘ib qilindi. Favqulodda vaziyatlar tizimi xodimlarining fidokorona mehnati, ularning inson hayotini saqlab qolish yo‘lidagi jasorati yoshlar uchun ibrat sifatida keltirildi.
Bundan tashqari, yoshlarning bo‘sh vaqtini mazmunli o‘tkazish masalasiga ham alohida urg‘u berildi. Sport, kitobxonlik, ijodiy faoliyat va turli to‘garaklarda ishtirok etish orqali ularning salohiyatini ro‘yobga chiqarish mumkinligi ta’kidlandi. Zero, yoshlarning bandligi va to‘g‘ri yo‘naltirilganligi jamiyatda turli salbiy holatlarning oldini olishda muhim omil hisoblanadi.
Tadbir yakunida faol, tashabbuskor va iqtidorli yoshlar alohida rag‘batlantirildi. Ularga esdalik sovg‘alari topshirilib, kelgusida ham ularning tashabbuslarini qo‘llab-quvvatlash, reja va maqsadlarini amalga oshirishda amaliy yordam ko‘rsatilishi qayd etildi. Bu esa yoshlarning o‘ziga bo‘lgan ishonchini yanada oshirib, ularni yangi marralar sari ilhomlantiradi.
Yoshlar bilan ishlash borasida olib borilayotgan bunday tizimli va maqsadli ishlar o‘z samarasini bermoqda. Yoshlar bilan ochiq muloqot, ularning muammolariga befarq bo‘lmaslik, har biriga individual yondashuv asosida ko‘maklashish bugungi kunning muhim talablaridan biridir.
Yoshlar — jamiyatning eng faol, eng harakatchan qatlami. Ularning bilimli, ma’naviy yetuk, vatanparvar bo‘lib ulg‘ayishi esa mamlakat taraqqiyotining mustahkam poydevorini yaratadi. Shu ma’noda, ularni qo‘llab-quvvatlash, to‘g‘ri yo‘naltirish va rag‘batlantirishga qaratilgan har bir tashabbus kelajagimiz uchun qo‘yilgan muhim qadamdir.
Shu bois bunday ezgu ishlar izchil davom ettirilishi, yoshlarning orzu-intilishlarini ro‘yobga chiqarish yo‘lida barcha imkoniyatlar safarbar etilishi zarur. Zotan, ertangi kun egalari bo‘lgan yoshlarning baxtli va farovon hayoti — bugungi sa’y-harakatlarimizning eng oliy natijasidir.
Zulfiya Soxibova
Surxondaryo viloyati FVB
Axborot xizmati yetakchi mutaxassisi
