O‘zbekiston Respublikasi Prezidenti Administratsiyasi huzuridagi Ommaviy axborot vositalari uchun kontent tayyorlash markazi hamda YUNESKOning O‘zbekistondagi vakolatxonasi hamkorligida Surxondaryo viloyatida davlat organlari va tashkilotlar axborot xizmatlari rahbarlari uchun “Strategik kommunikatsiyalar va axborotdan foydalanish imkoniyati” mavzusida seminar-trening tashkil etildi.
Ikki kunlik o‘quv mashg‘ulotlarida xalqaro ekspertlar — Joan Barata Mir, Serxiy Shturxetskiy hamda milliy ekspert Madina Tursunova ishtirok etmoqda.
Trening davomida erkin bayonot berish tamoyillari, OAV erkinligi, strategik kommunikatsiyani samarali yo‘lga qo‘yish, shuningdek, axborot sohasidagi xalqaro va milliy huquqiy me’yorlar yuzasidan bilimlar berilmoqda. Amaliy keyslar asosida ochiqlik, shaffoflik va tezkorlikni ta’minlash mexanizmlari muhokama qilinmoqda.
Mazkur seminar davlat organlari faoliyatining ochiqligini kuchaytirish, axborot xizmatlari kasbiy salohiyatini oshirish hamda jamoatchilik bilan samarali muloqotni mustahkamlashda muhim ahamiyat kasb etadi.
