Jarqo‘rg‘on tumani Fermerlari kengashi tashabbusi bilan “Abdurahmon” fermer xo‘jaligida qishloq xo‘jaligini rivojlantirishga qaratilgan amaliy seminar tashkil etildi. Unda viloyat va tuman Fermerlari kengashi mas’ullari, hokimlik vakillari hamda fermer xo‘jaliklari rahbarlari ishtirok etdi.
Seminarda qiymati 300 million so‘mlik suv tejamkor texnologiyalar joriy etilishi, ularning paxta va g‘alla hosildorligini oshirishdagi ijobiy samaralari muhokama qilindi. Shuningdek, “Yashil makon” umummilliy dasturi doirasida fermer xo‘jaligida 450 dona mevali ko‘chat ekilgani qayd etildi.
Mutaxassis va olim-agronomlar tomonidan yuqori hosildorlikka erishish, zamonaviy agrotexnologiyalarni qo‘llash, imtiyozli kreditlar va lizing xizmatlaridan samarali foydalanish bo‘yicha fermerlarga amaliy tavsiyalar berildi.
Mazkur seminar fermerlar uchun tajriba almashish, innovatsion yondashuvlarni joriy etish va qishloq xo‘jaligi mahsuldorligini oshirishda muhim ahamiyat kasb etdi.
