Ko‘plab nizolar va huquqbuzarliklar aynan huquqiy bilim yetishmasligi sababli kelib chiqadi. Fuqarolar o‘z huquqlarini bilmagani uchun aldovga uchramoqda, shartnomalarni o‘qimasdan imzolamoqda yoki qonuniy imkoniyatlardan foydalanmay qolmoqda. Advokatlik faoliyatida eng ko‘p uchraydigan masalalardan biri — fuqarolarning huquqiy oqibatlarni oldindan baholamasdan harakat qilishi bilan bog‘liqdir. Masalan, og‘zaki kelishuvlarga ishonish, hujjatlarni rasmiylashtirmaslik yoki sudga murojaat qilishdan cho‘chish fuqarolar manfaatlariga jiddiy zarar yetkazadi.
Shu bois har bir fuqaro shartnomalar va bitimlarni diqqat bilan o‘rganishi, o‘z huquqlarining buzilishiga befarq bo‘lmasligi shart. Zarurat tug‘ilganda, malakali huquqiy yordamga murojaat qilishi va qonunlarga hurmat bilan yondashishi lozim. Huquqiy madaniyatning yuksalishi jamiyatda qonun ustuvorligini ta’minlaydi, fuqarolar o‘rtasida o‘zaro ishonchni mustahkamlaydi va ijtimoiy adolat qaror topishiga zamin yaratadi.
Huquqiy savodxonlikni oshirish — bu nafaqat davlat idoralari, balki butun jamiyat oldidagi umumiy vazifadir. Huquqiy bilimga ega fuqaro o‘z manfaatlarini himoya qila oladi va jamiyat rivojiga munosib hissa qo‘shadi.
Firdavs Omonov,
advokat
