Surxondaryo viloyati hokimi Ulug‘bek Qosimov rahbarligida Muzrabot tumanida muhim infratuzilma loyihasini amalga oshirish ishlariga start berildi. D165 “Jarqo‘rg‘on shahri — Navshahar qishlog‘i — Boldir qishlog‘i — Turkmaniston Respublikasi chegarasi” avtomobil yo‘lining 39–50-kilometrlari oralig‘ida keng ko‘lamli ta’mirlash ishlari boshlandi.
Yo‘lni ta’mirlash ishlariga zamonaviy maxsus texnika va mexanizmlar jalb etilgan bo‘lib, ishlarni tasdiqlangan jadval asosida sifatli va qisqa muddatlarda yakunlash vazifasi belgilab berildi. Mazkur loyiha aholi va transport vositalari uchun qulayliklar yaratish, harakat xavfsizligini oshirish hamda hududlar o‘rtasidagi transport-logistika aloqalarini mustahkamlashga xizmat qiladi.
Shundan so‘ng, viloyat rahbari tumanda amalga oshirilayotgan investitsiya loyihalari bilan tanishdi. Jumladan, “Surxondaryo qurilish montaj” MCHJ tomonidan beton va beton mahsulotlari ishlab chiqarish korxonasi hamda “Yangi Shahar” MCHJ tomonidan amalga oshirilayotgan sholi yetishtirish va qayta ishlash loyihalarida olib borilayotgan ishlar ko‘zdan kechirildi.
Ushbu loyihalar doirasida 1 100 nafarga yaqin yangi ish o‘rinlari yaratilishi rejalashtirilgan. Viloyat hokimi loyihalar ijrosini jadallashtirish, mavjud resurslardan samarali foydalanish hamda obyektlarni belgilangan muddatlarda ishga tushirish yuzasidan mas’ullarga aniq topshiriq va ko‘rsatmalar berdi.
