Hukumatning 2026-yil 9-yanvardagi 8-son qarori bilan oliy ta’lim tashkilotlari talabalari va ish beruvchi tashkilotlar o‘rtasida hamkorlikni yo‘lga qo‘yish tartibi tasdiqlandi. Yangi tizimga ko‘ra, bakalavriatning 2-kurs va undan yuqori bosqichida tahsil olayotgan talabalarning o‘qish uchun shartnoma to‘lovlari ish beruvchilar tomonidan qoplanadi.
Buning evaziga talabalar o‘qishni muvaffaqiyatli yakunlagach, buyurtmachi tashkilotlarda ish bilan ta’minlanadi. Buyurtmachi sifatida kamida 50 nafar xodimga ega yoki 1 million AQSh dollari miqdoridagi investitsiya loyihasini amalga oshirayotgan tashkilotlar ishtirok etishi mumkin.
Talabalar har yili 20-sentyabrgacha elektron ariza topshiradi. Saralash jarayoni suhbat asosida 15-oktyabrgacha o‘tkazilib, bunda buyurtmachi tashkilot vakilining xulosasi asosiy mezon hisoblanadi. Shuningdek, talabalar joriy o‘quv yili uchun GPA ko‘rsatkichi kamida 3.0 bo‘lishi lozim.
Uch tomonlama shartnoma asosida o‘qishni muvaffaqiyatli tugatgan talabalar bitirishi bilan to‘g‘ridan-to‘g‘ri ishga qabul qilinadi.
