Sariosiyo tumanida “Yashil makon” umummilliy loyihasi doirasida ko‘kalamzorlashtirish va obodonlashtirish ishlari keng ko‘lamda olib borilmoqda. Ayni kunlarda tuman hududlarida hamisha bahor hamda turli manzarali daraxt va buta ko‘chatlarini ekish ishlari qizg‘in tus olgan.
Xususan, obodonlashtirish ishlari doirasida M41 avtomobil yo‘li bo‘ylarida hamda “Yangi O‘zbekiston” massivi yo‘l chetlaridagi bo‘sh maydonlarda manzarali daraxt va buta ko‘chatlari ekilmoqda. Ekilgan ko‘chatlarni doimiy sug‘orish, parvarishlash va ularning yashab ketishini ta’minlash bo‘yicha ham tizimli ishlar rejalashtirilgan.
Mazkur tadbirlar hudud ekologiyasini yaxshilash, aholi uchun qulay va ko‘rkam muhit yaratish, shuningdek, yashil hududlar salmog‘ini oshirishga xizmat qilmoqda.
