Oltinsoy tumanida aholini uzoq yillardan buyon qiynab kelayotgan suv ta’minoti masalalari bosqichma-bosqich o‘z yechimini topmoqda. Jumladan, “Yangiqurilish”, “Madaniyat” va “Jiyanbobo” mahallalarida aholi tomorqalari hamda fermer xo‘jaliklari yerlarini sug‘orib kelayotgan ariqlarni betonlash ishlari boshlandi.
Mazkur ishlar tuman hokimi Otabek Mavlyanov boshchiligida mutasaddi tashkilotlar hamkorligida amalga oshirilmoqda. Ariqlarni betonlash orqali suv yo‘qotilishining oldi olinib, suv resurslaridan samarali foydalanish hamda qishloq xo‘jaligi yerlarining unumdorligini oshirish ko‘zda tutilgan.
Hozirda belgilangan hududlarda qurilish ishlari jadal olib borilmoqda. Ushbu amaliy chora-tadbirlar natijasida aholining ko‘p yillik murojaat va takliflari inobatga olinib, muhim muammo hal etilmoqda. Tuman hokimligi tomonidan infratuzilmani yaxshilash va obodonlashtirish ishlari kelgusida ham izchil davom ettirilishi rejalashtirilgan.
