Surxondaryo viloyatida tabiiy gaz yetib bormagan ko‘p qavatli uylarni xavfsiz va samarali yoqilg‘i bilan ta’minlash maqsadida Yaponiyaning zamonaviy “ITO” uskunalari joriy etilmoqda. “Hududgazta’minot” AJ tomonidan amalga oshirilayotgan loyiha doirasida Jarkurg‘on tumanidagi ikki qavatli 32 xonadonli uylar “ITO-05” rusumli sintetik tabiiy gaz ishlab chiqaruvchi uskunalar bilan jihozlandi. Shuningdek, Muzrabot tumanidagi ko‘p qavatli uylar ham shu tizim asosida gaz bilan ta’minlanadi.
Mazkur texnologiya yordamida endilikda aholiga maishiy gaz ballonlarisiz, xavfsiz va barqaror yoqilg‘i yetkaziladi. Gaz maxsus ballonlarda to‘ldirilib, qayta ishlangach, quvur orqali xonadonlarga uzatiladi.
Mutaxassislar fikricha, bu tizim energiyani tejaydi, yonish xavfini kamaytiradi va iste’molchilarga qulaylik yaratadi. Ushbu loyiha hududda ekologik toza, xavfsiz va zamonaviy energiya tizimlarini joriy etish yo‘lidagi muhim qadam bo‘lib, aholi turmush darajasini yanada yaxshilashga xizmat qiladi.
