O‘zbekistonda sport sohasiga qaratilayotgan ulkan e’tibor bugun qanday samara berayotganligini barchamiz ko‘rib turibmiz. Amalga oshirilayotgan islohotlar, yaratilgan shart-sharoit va imkoniyatlar natijasida Olimpiya, jahon va qit’a chempionatlarida, xalqaro turnirlardagi yutuqlarimiz tobora ko‘payib bormoqda. Sportning barcha yo‘nalishlarida yuksak natijalarga erishmoqdamiz. Bugungi kunga kelib, Termiz davlat universitetida ham sportni rivojlantirish bo‘yicha barcha chora-tadbirlar amalga oshirilmoqda. Sportning 18 ta turi bo‘yicha sport to‘garaklari tashkil qilingan. Jumladan, barcha shart-sharoitlarga ega bo‘lgan uchta sport zal, futbol maydoni, sport maydonchalari, vorkaut hamda fitnes zallarida talaba-yoshlar muntazam shug‘ullanib kelishmoqda. Buning natijasi o‘laroq, talabalar 2025-yilda turli respublika musobaqalarida, jumladan, “Universiada”, “Besh tashabbus olimpiadasi”, “Talabalar ligasi”, O‘zbekiston chempionati va kubogi, xalqaro turnirlar, Osiyo chempionati va boshqa nufuzli musobaqalarda 59 ta oltin, 33 ta kumush hamda 54 ta bronza, jami 146 ta medallar jamlanmasi qo‘lga kiritishdi.
Ayniqsa, universitet talabalari o‘rtasida gandbol sport turi ham keng ommalashib bormoqda. Ushbu o‘quv yilida talabalarimiz “Universiada-2024” respublika sport musobaqasida 2-o‘rin, “Talabalar ligasi” musobaqasida 1-o‘rinni egallashdi. Shuningdek, Hindistonning Lakxnau shahrida gandbol bo‘yicha U-18 o‘smirlar va U-20 yoshlar jamoalari o‘rtasida Xalqaro gandbol federatsiyasi kubogining Osiyo qit’asi bosqichi bellashuvlarida har bir yosh toifasida gandbolchilarimiz 1-o‘rinni qo‘lga kiritib, Xalqaro gandbol federatsiyasi kubogining qit’alararo bosqichiga chiqishdi. Unda talabalarimiz kumush medaliga sazovor bo‘lishdi.
Xurshida Berdiyeva,
TerDU jismoniy tarbiya va sport o‘yinlari kafedrasi p.f.b.f.d.(PhD)
