Paxta — yurtimiz iqtisodiyotida muhim o‘rin tutadigan strategik mahsulot. Uning o‘z vaqtida va sifatli terib olinishi nafaqat fermerlarning daromadi, balki mamlakatimiz iqtisodiy barqarorligiga ham bevosita ta’sir ko‘rsatadi. Shu bois Surxondaryo viloyatida paxta hosilini qisqa muddatda, sifatli va yo‘qotishlarsiz yig‘ib olish uchun zarur tashkiliy ishlar amalga oshirilmoqda.
Xususan, fermer xo‘jaliklariga amaliy yordam ko‘rsatilmoqda, terimchilar uchun dalalarda issiq ovqat, ichimlik suvi, dam olish joylari va boshqa zarur shart-sharoitlar yaratilgan.
Viloyat hokimi Ulug‘bek Qosimov Termiz, Angor, Muzrabot, Sherobod va Qiziriq tumanlarida bo‘lib, paxta yig‘im-terimi jarayonlari hamda belgilangan vazifalar ijrosi bilan tanishdi.
Tashrif davomida dalalarda yaratilgan sharoitlar o‘rganildi, terimchilarning fikr-mulohazalari tinglandi. Mas’ullar tomonidan hosilni o‘z vaqtida yig‘ib olish, yuqori sifatli navlarda topshirish orqali fermerlar va oilaviy pudratchilarning daromadini oshirish yuzasidan ko‘rilayotgan chora-tadbirlar haqida ma’lumot berildi.
Shuningdek, faol terimchilar esdalik sovg‘alari bilan taqdirlandi.
