O‘zbekiston va Qozog‘iston meva-sabzavot va boshqa tez buziladigan yuklarni tashish uchun “yashil yo‘lak” tizimini joriy etishni taklif qilmoqda. Bunda bojxona tartibotlarini soddalashtirish, bojxona axborot tizimlarini uyg‘unlashtirish, zamonaviy logistika markazlarini qurish, shuningdek, yuk tashish va yetkazib berishda vaqt hamda moddiy xarajatlarni kamaytirish uchun chegara o‘tish punktlarini modernizatsiya qilish masalalari ham ko‘rib chiqilmoqda.
G‘ishtko‘prik (O‘zbekiston) – Jibek Joli (Qozog‘iston) va Davut ota (O‘zbekiston) – Tajen (Qozog‘iston) asosiy chegara o‘tkazish punktlarida ta’mirlash ishlarini tezlashtirish orqali savdo hajmini va turizm ko‘rsatkichlarini oshirish bo‘yicha amalga oshiriladigan chora-tadbirlar belgilandi. Sirdaryo viloyati hududida tashkil etilayotgan Xalqaro sanoat kooperatsiyasi markazi yaqinida joylashgan Sirdaryo–Atameken chegara o‘tkazish punkti infratuzilmasini zamonaviy talablar asosida modernizatsiya qilish masalasiga ham alohida e’tibor qaratildi.
