O‘zbekiston XDP Surxondaryo viloyat Kengashi tashabbusi bilan Boysun tumani, “Sayrob” mahallasidagi 8-sonli oilaviy poliklinikada ehtiyojmand va ijtimoiy himoyaga muhtoj aholi uchun bepul chuqurlashtirilgan tibbiy ko‘rik tashkil etildi. Aksiya doirasida ginekolog, oftalmolog, onkolog, nevropatolog, travmatolog, nevrolog, terapevt, kardiolog, urolog, pediatr va endokrinolog kabi mutaxassislar aholiga xizmat ko‘rsatdi.
Tibbiy ko‘rikda jami 50 nafar fuqaro qatnashdi. Natijada, 24 nafar bemorga shahar miqyosidagi shifoxonalarda davolanish tavsiya etildi, 26 nafar bemor esa ambulator tartibda davolanadi. Shuningdek, yotib qolgan, nogironligi bor bemorlar hamda keksalar maxsus mobil brigadalar tomonidan uy sharoitida ko‘rikdan o‘tkazildi.
Tibbiy ko‘rik davomida aniqlangan kasalliklar yurak-qon tomir, endokrin, ruhiy, ko‘z kasalliklari kabi guruhlarga ajratildi. Fuqarolar sog‘lig‘i ustidan doimiy nazorat o‘rnatilib, ularga tegishli shifokorlar kuzatuvi belgilandi.
