Bo‘sh maydonlardan unumli foydalaniladi

Hududlarda mavjud imkoniyatlardan samarali foydalangan holda yangi loyihalarni amalga oshirish, ish o‘rinlari yaratish, infratuzilmani yaxshilash va xizmatlar sohasini rivojlantirish orqali aholi turmush farovonligini oshirishga alohida e’tibor qaratilmoqda. Shu maqsadda, Surxondaryo viloyati hokimi Ulug‘bek Qosimov Sariosiyo tumaniga tashrif buyurib, “To‘palang” daryosi qirg‘oqlarini mustahkamlash, bo‘sh maydonlardan foydalanish hamda rejalashtirilgan loyihalar taqdimoti bilan tanishdi. Daryo qirg‘og‘ini mustahkamlash orqali hududda savdo va xizmat ko‘rsatish nuqtalarini tashkil etish uchun imkoniyat yaratilayotgani ta’kidlandi. Shuningdek, ishlarni jadallashtirish, qirg‘oqni mustahkamlash ishlarini yakunlash va loyihalar qurilishini boshlash vazifalari belgilab berildi.
Shundan so‘ng, hokim “Afrosiyob” mahallasida avvalgi tashriflarda berilgan topshiriqlar ijrosi bilan tanishdi. Yo‘llarni asfaltlash, beton ustunlar o‘rnatish kabi ishlar bajarilgan, yangi avtoturargoh tashkil etilgan hamda yo‘laklarda noqonuniy qurilmalar bartaraf etilib, aholining erkin harakatlanishi uchun qulay sharoitlar yaratilgan. Mutasaddilarga kelgusida bajarilishi lozim bo‘lgan vazifalar yuzasidan tegishli ko‘rsatmalar berildi. Ushbu mahallada joylashgan sobiq maxsus maktab internati binosidagi fizoterapiya jihozlari ko‘zdan kechirilib, bo‘sh binoda aholiga tibbiy xizmat ko‘rsatishni tashkil etish, jumladan, mavjud extiyojdan kelib chiqib, fizoterapiya markazini yo‘lga qo‘yish vazifasi topshirildi.