Askar onalarini sharaflab

Har qanday muvaffaqiyatga erishgan insonlarning ortida ularni dunyoga keltirgan, kuch-quvvat va imkoniyat yaratgan ota-onalar turadi. Albatta, onalarni eng ko‘p e’tirof etmaslikning iloji yo‘q. Mamlakatimizda O‘zbekiston Respublikasi Qurolli Kuchlari tashkil etilganining 33 yilligi hamda Vatan himoyachilari kuni munosabati bilan o‘tkazilayotgan qator harbiy-vatanparvarlik tadbirlari orqali onalarga ham ehtirom ko‘rsatildi. Jumladan, “Askar onalarini sharaflaymiz” mavzusidagi tadbirlar harbiy qismlarda muddatli harbiy xizmatni o‘tayotgan askarlar uchun ota-onalar bilan diydorlashuv onlarini taqdim etdi.
Uzun tumanidagi Davlat xavfsizlik xizmati Chegara qo‘shinlarida ham ana shunday telemuloqot tashkil etildi.
Askarlikdagi farzandining bir yil davomida kuchga to‘lib, haqiqiy mard o‘g‘longa aylanganini ko‘rgan onalarning ko‘zlarida sevinch yoshlari qalqidi. Otalar ko‘ksi g‘ururga to‘ldi. Vatanimizga sodiq, mard va yurtparvar yigitlarni voyaga yetkazgani uchun onalarga minnatdorlik bildirildi.
Tadbir davomida tuman madaniyat bo‘limi xonandalarining vatanparvarlik ruhi bilan yo‘g‘rilgan qo‘shiqlari dillarga quvonch baxsh etdi.