TISU delegatsiyasi Yaponiyada

Tashkil etilganiga endigina bir yil bo‘layotgan nodavlat oliygoh — Termiz iqtisodiyot va servis universiteti rahbariyati, jamoasi tinib-tinchigani yo‘q. Yetuk va malakali kadrlarni yetishtirish uchun barcha imkoniyatlarni ishga solgan. Xalqaro hamkorlik aloqalariga, tajriba almashinuviga katta e’tibor qaratgan.
Ayni maqsadlarni ko‘zlagan holda Termiz iqtisodiyot va servis universiteti delegatsiyasi ayni paytda Yaponiya davlatida bo‘lib, u yerdagi WASEDA universitetida amaliy uchrashuv o‘tkazdilar. Universitet professorlari Atsushi Ogihara va Shoji Nishimura bilan bo‘lib o‘tgan uchrashuvda TISUning Yaponiyadagi mazkur universitet bilan hamkorlikning istiqbolli yo‘nalishlari muhokama qilindi.
Xususan, professor-o‘qituvchilar va talabalar almashinuvini yo‘lga qo‘yish, qisqa muddatli malaka oshirish kurslarini tashkil etish, xalqaro iqtisodiyot, turizm, tibbiyotda va oliy ta’limda zamonaviy texnologiyalarga oid hamkorlikda ilmiy tadqiqotlar olib borish kabi masalalar bo‘yicha kelishib olindi.