Pensiya avtomatik tayinlanadi

2025-yil 1-martdan boshlab yoshga doir pensiyalar fuqarolarning murojaatisiz (avtomatik) tayinlanadi. Fuqaroning shaxsiga oid barcha maʼlumotlar vazirlik va idoralarning elektron bazalaridan olinadi. Pensiya taʼminoti tizimiga axborot texnologiyalarini faol joriy qilish orqali fuqarolarga koʻrsatilayotgan xizmatlar bosqichma-bosqich interaktiv va proaktiv shaklga oʻtkazilmoqda.
Buning uchun fuqarodan hech qanday hujjat talab etilmaydi. Ushbu qulayliklarning yoʻlga qoʻyilishi natijasida fuqarolardan pensiya tayinlash uchun qoʻshimcha hujjatlar yigʻish uchun Pensiya jamgʻarmasining hududiy boʻlinmasiga murojaat qilish talab etilmaydi.
Qolaversa, pensiya yoshiga yetgan fuqaroning telefon raqamiga “pensiya tayinlanganligi va uning miqdori” toʻgʻrisida maʼlumot yuboriladi. Shuningdek, pensiyaga chiqmasdan ish faoliyatini davom ettirish istagida boʻlgan yoki pensiya miqdoridan norozi boʻlgan fuqarolarga “avtomatik” tayinlangan pensiyani toʻxtatish huquqi berilmoqda.Fuqaroga “avtomatik” pensiya tayinlanganligi yoki pensiya tayinlanishi rad etilganligi haqida SMS xabar yuboriladi.
Fuqaro pensiya tayinlanganidan, pensiya miqdoridan yoki pensiya tayinlanishi rad etilganidan norozi boʻlgan taqdirda, Pensiya jamgʻarmasining tuman (shahar) boʻlimiga tegishli tartibda ariza bilan murojaat qilishlari mumkin.