Maqom san’ati ko‘pchilik sharq xalqlari musiqa merosida mavjud bo‘lib, milliy musiqaning asosini tashkil etadi. Maqomlar ma’lum tartibda yaratilgan turkumli musiqiy majmuadir. Qolaversa, bastakorlik ijodiyotining o‘ziga xos sayqal berilgan turidir. Maqomlar keng ma’noda xalq musiqasi qomusidir. Chunki ularda, xususan Shashmaqomda o‘zbek va tojik xalqlari musiqasiga xos vazn xususiyatlari, sado-ohanglar, doira usullari, she’riyat bilan xalq ashula yo‘llarining bog‘lanish qoidalariga asoslangan qator jabhalar oz to‘laqonli ifodasini topgan.
Davlatimiz rahbarining “Madaniyat va sanʼat sohasini yanada rivojlantirishga doir qo‘shimcha chora-tadbirlari to‘g‘risida”gi qarori ijrosini taʼminlash maqsadida O‘zbek milliy maqom sanʼati markazi Xorazm viloyati hududiy bo‘limi tomonidan Termiz tuman Madaniyat bo‘limida konsert dasturi namoyish etildi.
Tuman hokimligi, Respublika Maʼnaviyat va maʼrifat markazi tuman bo‘linmasi, tuman Madaniyat bo‘limi hamkorligida o‘tkazilgan tadbirda xorazmlik sanʼatkorlar tomonidan konsert dasturi namoyish etildi. Dastur davomida aka-uka G‘ofur va G‘ulom Eshjonovlar ijrosidagi qo‘shiqlar tomoshabinlar uchun ajoyib tuhfa bo‘ldi. Bu kabi tadbirlarning o‘tkazilishi xalqmiz, xususan, yoshlar o‘rtasida maqom sanʼatini keng targ‘ib etish, bu orqali ular ongida milliy o‘zlikni anglash tuyg‘usini yuksaltirishda muhim ahamiyat kasb etadi.
