“Barqaror kelajak sari” g‘oliblari aniqlandi

Shunday loyiha va g‘oyalar bo‘ladiki, ikkilanish va hadik sabab ro‘yobga chiqmasdan, yo‘qlikka mahkum. Ammo, ularni amaliyotga tatbiq etsak bormi, jamiyat uchun qanchalar foyda keltirishi mumkin. Birinchi navbatda ana shunday jihatlarga e’tibor qaratib, harakatni boshlagan ma’qul.
Boysun tumanidagi 1-son kasb-hunar maktabi o‘qituvchi va o‘quvchilari ham o‘zlarida ishonch bilan “Ho‘l meva, sabzavot chiqindilari va o‘simlik qoldiqlaridan to‘qimachilik mahsulotlari uchun rang tayyorlash va tayyorlangan ip-gazlamadan milliy liboslar hamda sovg‘abob mahsulotlar ishlab chiqarish” loyihasi ustida ishlashdi. Natijaga erishish mumkinligi esa ularning ishtiyoqini yanada oshirgani ham rost.
Ushbu loyiha bilan Toshkent shahrida Germaniya xalqaro hamkorlik jamiyatining “O‘zbekistonda kasb-hunar ta’limi tizimini isloh qilish va modernizatsiyalash jarayonini qo‘llab-quvvatlash (TexVET )” loyihasining “Barqaror kelajak sari” 2023-2024-yil tanlovida ishtirok etishdi. Buni qarangki, yosh izlanuvchilarimizning loyihasi kengash a’zolariga ma’qul kelib, 1-o‘rinni munosib ko‘rildi.