Qiziriqlik ishsiz ayollarga ish taklif etishganida avvaliga ikkilanganlar, yangi ish joylarini ko‘rib, ko‘zlari quvonchdan porladi. Yaratilgan shart-sharoitdan, keng va shinam xonalarda ishlash kimni ham quvontirmaydi deysiz. Sababi Qiziriq tumanida “Kasanachilik markazi” tashkil etildi. Markaz uchun munosib joy sifatida esa tumandagi “Do‘stlik” mahallasida joylashgan, hozirda samarali foydalanilmayotgan, sobiq qishloq xo‘jaligi kasb-xunar kollejining o‘quv ustaxonasi tanlandi. Mahalliy tadbirkorlar hamkorlik va hamjihatlikda tashkil etilgan markaz faoliyatga mos va xos tarzda jihozlandi, qulayliklar yaratildi.
“Kasanachilik markazi”ni ishga tushirish marosimida Surxondaryo viloyati hokimi Ulug‘bek Qosimov ishtirok etdi va bandligi taʼminlangan xotin-qizlar bilan suhbatlashdi. U yerda yaratilgan sharoitlar bilan tanishdi.
Qayd etish lozimki, ushbu loyiha 1,4 milliard so‘m subsidiya mablag‘lari evaziga amalga oshirilgan bo‘lib, 200 ta doimiy ish o‘rni yaratilgan. Qo‘li gul chevar va tikuvchilarning xizmati bilan kasanachilik markazida yiliga 20 ming dona tayyor mahsulot (ayollar va erkaklar kiyimlari) ishlab chiqarilishi reja qilingan.
Sohibjamol
