7-aprel — “Umumjahon sog‘liqni saqlash kuni” sifatida 1950-yildan buyon e’tirof etiladi. Aslida-ku har kuni, har daqiqa va har onda sog‘ligimiz uchun qayg‘urishimiz, ovqatlanish ratsioniga, sog‘lom turmush tarziga amal qilmog‘imiz lozim. Ana shundagina na semizlik va na biror kasallik organizmimizni yenga olmaydi. Ana shunday xatti-harakatlar uzoq umr ko‘rishning chin formulasidir.
Sog‘lom bo‘lishning yana bir siri esa piyoda yurishdir. Piyoda yurishning foydali jihatlari ko‘p — organizmdagi ortiqcha yog‘lar eriydi, qon yurishadi, tetiklik his qilish esa asosiysi. Aynan piyoda yurishni odatlantirmoq maqsadida “Umumjahon sog‘liqni saqlash kuni” bir sabab bo‘lib, Oltinsoy tumanida “Sog‘lom hayot sari 5000 qadam” piyoda yurish marafoniga start berildi.
Tuman markazidan to Boysun-Denov katta yo‘l traktigacha bo‘lgan yo‘lgacha piyoda yurishni maqsad qilgan ko‘ngillilar erta tongdan start chizig‘idan finishga yo‘l oldilar. Oltinsoy tumani hokimi o‘rinbosari Xayrulla Qosimov esa ko‘ngillilarga bosh bo‘ldi.
O‘z muxbirimiz
