Bolani yoshligidan yo san’atga, yo robototexnikaga qiziqtirish so‘nggi paytlarda urfga aylandi desa ham bo‘ladi. To‘g‘ri-da, san’atga oshno ko‘ngildan texnik bilimlar, raqamlar, hisob-kitob va qonuniyatlar bilan ish ko‘rish qiziq emas. Nima bo‘lganda ham har bir yoshni o‘z qiziqishi, layoqatiga qarab yo‘naltirish lozim. Ana shundagina har bir sohada muvaffaqiyatga yuz tutish mumkin.
Ammo, Oltinsoy tumanidagi 36-sonli umumta’lim maktabining 8-sinf o’quvchisi Shernazar Mardonovda har ikki qarama-qarshi sohada ham iqtidor borligi ayon bo‘ldi. Qanday deysizmi, u musiqa ijro etuvchi robot ixtiro qildi. Bir qarashda karton uyumidan yasagan oddiygina jismda insonlarniki kabi yuz-ko‘z, qiyofa, qo‘l-oyoqlar bor. Ichi esa tashqi ko‘rinishni boyitishga xizmat qiluvchi sxematik tuzilmalar bilan boyitilgan. Shunchaki, kerakli tugmani bossangiz, robot jonlanadi, ko‘zlari chaqnab, musiqa ijro etishni boshlaydi. Qanday musiqa tinglashni istasangiz, o‘sha musiqani robotga dasturlash kifoya.
Yosh ixtirochining esa kelajakdagi orzu va maqsadlari katta. U ushbu loyihasini yanada boyitib, mukammallashtirishni o‘ylagan.
S.Davlatova
