Farzandimizni ko‘z qorachig‘imizdek asrab, himoya qilish, risoladagidek ta’lim-tarbiya olishiga shart-sharoit yaratish ota-onalik burchimiz. Ammo, farzandi taqdiriga jiddiy qaramaslik holatlarining-da uchrashi ayanchli. Mana shunday holatlarda har bir bola davlat himoyasida bo‘lishini eslatib o‘tmoq lozim. Ularning huquq va manfaatlari qonun yo‘li bilan himoya qilinadi. Bu borada prezident tomonidan imzolangan Qonun (O‘RQ–823-son, 15.03.2023 y.) bilan ayrim qonun hujjatlariga qo‘shimcha va o‘zgartishlar kiritildi.
Jumladan, Maʼmuriy javobgarlik to‘g‘risidagi kodeksga kiritilgan qo‘shimchaga ko‘ra O‘zbekiston fuqaroligiga ega bolani ota, ona yoki ularning o‘rnini bosuvchi shaxs yoxud hamrohlik qiluvchi shaxs tomonidan chet davlat hududida nazoratsiz qoldirish BHMning 10 baravaridan 50 baravarigacha (3 million so‘mdan 15 million so‘mgacha) miqdorda jarima solishga sabab bo‘ladi.
Shunga ko‘ra, maʼmuriy huquqbuzarlik to‘g‘risidagi ishni ko‘rib chiqishda ko‘pi bilan 30 kunlik muddat belgilanib, sud ushbu huquqbuzarlikni sodir etgan shaxs zimmasiga bolani chet davlatdan O‘zbekistonga qaytarish yoxud huquqbuzarlikni bartaraf etish bo‘yicha choralar ko‘rish majburiyatini yuklaydi.
Manbalar asosida H.Baxtiyorova tayyorladi
