Surxondaryoda milliy hunarmandchilikning o‘ziga xos maktabi shakllanganki, bu xalqimizning milliy qadriyatlarini, boqiy san’atini o‘zida tarannum etadi. Bu san’atdan bahra olamiz, estetik zavq olamiz. Uni avloddan-avlodga o‘tkazish, bezavol yetkazish esa xalqimizning har biri vakili oldida turgan burchdir. Shunday ekan, milliy hunarmandchilikni rivojlantirish, taraqqiy topishi uchun ommalashtirish lozim.
Angor tumani “Yangi turmush” mahallasida bunyod etilgan “Angor baraka” savdo kompleksi milliy hunarmandchilik markazi bo‘lib, ana shunday vazifani bajaruvchi korxonalardan biri deya ishonch bilan aytish mumkin. Bu yerda xotin-qizlarni ish bilan taʼminlash va milliy hunarmandchilikni rivojlantirishning tamomila yangi tizimi yaratilgan. Loyiha qiymati 80 milliard so‘m bo‘lib, markazda 1000 nafar xotin-qiz ish bilan taʼminlangan va ular 50 turdagi milliy libos va hunarmandchilik buyumlari ishlab chiqarishadi.
Markazning birinchi hamda ikkinchi qavatida milliy kiyim-kechak, qo‘lqop, parda, ayollar kiyimlari, avtomobillar chexollari va ayollar sumkalari, quroqchilik, kashtachilik, yumshoq o‘yinchoqlar, janda to‘qish, kulolchilik, milliy suvenirlar ishlab chiqarish bilan shug‘ullanadigan 71 ta shoxobcha tashkil etilgan. Majmuaning uchinchi qavatida 44 ta savdo va xizmat ko‘rsatish nuqtasi, to‘rtinchi qavatda beshta umumiy ovqatlanish shoxobchasi va bitta bolalar o‘yingohi barpo etish reja qilingan.
Hilol
