Termiz shahridagi temir yo‘l vokzali har doimgidan-da gavjum. Bu yerda o‘zgacha kayfiyat, his-tuyg‘ular hukmron. Jarayonni kuzatishning o‘ziyoq kishini hayajonga soladi. Sababi er yigitlar egnilariga yarashgan harbiylik libosida Vatan xizmatiga otlanishgan. Ularning qadam tashlashlari, egnidagi libos mas’uliyati va salobati ham bu kunda ko‘rgan ko‘zning e’tiborini tortmay qolmaydi.
Mard o‘g‘lonlarni kuzatishga chiqqan ota-onalar, ularning yaqinlari esa bo‘lajak askarning hayajoniga, xursandchiligiga sherik. Termiz temir yoʻl vokzalida Surxondaryo viloyati tuman (shahar) mudofaa ishlari boʻlimlari tomonidan 470 nafar harbiy xizmatga chaqiriluvchilar Vatan oldidagi muqaddas burchlarini oʻtash uchun muddatli harbiy xizmatga kuzatildi.
Janubiy operativ qo‘mondonligi, Surxondaryo viloyati mudofaa ishlari boshqarmasi, Termiz harbiy prokuraturasi, ota-onalar, faxriylar, ijodkor va san’atkorlar bo‘lajak yurt posbonlariga yuksak ishonch bildirib, ularning faoliyatiga ulkan zafarlar tiladi.
Sohibjamol
