Janubiy o‘lkamizda bahor ertaroq keladi. Quyosh nurini qizg‘onmay socha boshlaydi, ob-havoda iliqlik seziladi. Daraxtlar kurtak yozib, gullar yerdan yuz ochib boshlaydi. Ana shunday pallada esa dalada ishlar qizg‘in tus oladi. Bobodehqon ketmonini oladi-da, rizq-ro‘z, mo‘l-ko‘l hosil tilab ishga kirishadi. Demak, oq oltin – paxta ekish tadbirlarini boshlashga muddat kelganini vaqtning o‘zi ko‘rsatib turgan ekan, har soniyani g‘animat bilmoq lozim.
Milliy boyligimiz bo‘lgan paxta ekish tadbirlari avvalida esa Sherobod tuman hokimligi hamda “Surxondaryo agroxizmat” MCHJ tomonidan ehson oshi tarqatildi. Yosh-u keksa, belini mahkam bog‘lab yordamga kelgan borki, oshga taklif etildi. Bir piyola choy ustida nuroniylarning duosi olindi. Ekilayotgan paxta o‘sib-unib, kelgusida hosilning barakali bo‘lishi niyat qilindi.
S.Davlatova
